دوبیتی های لکی

 

زمین داخ و بدن لت و حیره تاو
بیلا تا بشگیه هردک چیه مم خاو
رته رتمه اگر چی کوگ زخمی
ویارم گم بیه دیرم میه مر آو

فلک ار ای بنومیمونه هو که
مزانی دردمو وژته عرو که
هماری وتمه تو دردم بوئه چه
فلک تو اِ گُـله رُی هر درو که

 

اِ تو هرچی گه بوشن کـل سره می
یقین دیرم نمه ذانم ولی کی
زمی لرزه خمت باجی ولاتی
چته دیوار یه خشتی منه می

مـــنی چی تو خَـَمینم هوره نی ری
زنــی ســخده برا! خاپــوره نــی ری
لُتا بـیـمو فلک! ترســی دیه نی ریم
کـــسوی لُـــتا کــَنی دلـــشوره نی ری

درینم سی بیه سه کـت داواری
بلا چی تیر ا نوم جیه ر مه مگواری
بیلا تاگه بوئینم راسه موشن
وارونه برگ درّیارا ماواری

تو چی مونگی مه اژ تو دویر دویر م
مه بی تو گرد خِن بی نویر نویرم
تو گه دیه دوسی ام باور نمه هی
کراسی مر مه اِ قرعو بوئیرم

چمر هات ای دواره هم بیه شو
دلم چی طلف بی شیری کتر تو
رضا تاکی خمین کل ولاتی
کسه فکرت نیه ای فکر کس نو

نصی کس ناو اژی حالَ گه دیریم
صو تا ایواره پی ترّ خصه میریم
کیه مو ضرب در رو سیمره که
اسه مائه دسِت اندازه گیریم

بیِه گِل هوتِل گیونم نموسی
دِله موشی مه  می مونم ،نموسی
شوئه کـُی روژل پر وا گرّینم
فرجی بختم ار شونم نموسی

چی فرهای وخده ار نوم سرم دم
وه دو دَس تیشه ار نوم پیکرم دم
اخنکه هادرینم داخ  وخده
چی قَقنس آگره بال و پرم دم

نکیلونا دلم هرهونه مه بیل
ولم ده  تا  گه وخدی ویر ماو ه قیل
اجی طوره گه چینْ آگرته ژی    دام
موقی ماینه دیارم بیمه سه بیل

جیه رم ســُت اژ تـُنیره یه کاواوه
حاوالِ جیه ر ستی پرسین ثوواوه
مهی تا هر بگیرم چُین مذانی
لونه موری وه یه شونم خراوه

خصه هاتِ دیارم آشنا بیم
پیِا داتی وه گردی آشنا بیم
کِلِم کرد و ولم داتی بوئه چه
مه هر یارو پریشونِ خدا بیم

گـُرّاو دس آرزو دیه ر بی وه ژونه
خصه هت و خنی داتْیَه ر چقونه
خشالی بی وه  سایرّ نیمه رو کرّ
خصه چــُی  سایرّ ایواره گونه

اجل کاری بهه دا رَس نمینی
بوری کلمو بکش تا کس نمینی
مه کتمه گاز گور چرخ ، اما
فلک پیش گرتیه تا پس نمینی

زنی بوری حیا که دیه ر   ولم که
سرت فن دامه کم دس اِ ملم که
مه قیقولم تمومه هر تشیشم
اجل مَردی بهه بوری کلم که

مه تا آخر اِ ساله گیو نمارم
گیون تاو رنج بی پایو نمارم
برا هم پشته واگیژه منم مه
چی واگیژه سره سامو نمارم

جیه رم ست مر تو کاواوتِه منه می
زمین چق منم آوتِه منه می
اژی طوره منت ناسه دم تیر
مریتی خین سویراوتِه منه می

فلک کارت اری مه هر لچک بی
نهارت خم بیو شومت درک بی
مزانی بیه ر مه اژ باخت بیه چه
گپی بی حواردم اما هر کچک بی

 

نفس دیرم ا بن گیونا مکیشم
خجالت سفره بی نونا مکیشم
چی آهو ا ور شیر ایر گریزیا
هناسی ا سر شونا مکیشم

رفیقی تو کل اری پا برو بی
اری خواری بشر لشتر گرو بی
چمر آدم اری دونی گنم بی
اگر نونی بحوارداتی مرو بی